Mae Undeb yr Annibynwyr Cymraeg (UAC) yn galw ar holl aelodau’r eglwysi i ymateb yn hael i’w hapêl De Affrica ar ran Cymorth Cristnogol.
Mae’r apêl, fydd yn rhedeg am flwyddyn, yn canolbwyntio ar bump o bartneriaid Cymorth Cristnogol - sy’n gweithio gyda’r rhai sydd heb dir, gwragedd sy’n byw gyda HIV, pobl ifanc difreintiedig a phlant amddifad a bregus, ac fe’i lansiwyd yn swyddogol ar 4ydd o Orffennaf 2008 yng nghyfarfodydd blynyddol UAC yn Abertawe.
Dyma’r pumed tro i UAC gefnogi gwaith partneriaid Cymorth Cristnogol ar draws y byd.
Cefnogi ein gwaith
Dywedodd Gareth Morgan Jones, sy’n cadeirio adran dinasyddiaeth UAC, ‘Cawsom ymateb da i Apeliadau Bangladesh, Canolbarth America, Swdan ac Israel-Palesteina, ac yr ydym yn awyddus i gefnogi gwaith partneriaid Cymorth Cristionogol yn Ne Affrica y tro hwn.’
Ein gobaith yw y bydd ein heglwysi yn uniaethu gyda'r sefyllfaoedd ac yn casglu yn hael i gefnogi’r gwaith.’
Pecyn yr apêl
Y bwriad y tro yma yw cael y 26,000 o aelodau’r 450 eglwys sy’n perthyn i UAC i godi £1 bob mis am flwyddyn yr apêl, ac mae’r pecyn apêl arbennig ar y wefan hon yn cynnwys sawl awgrym i gynorthwyo’r eglwysi i gyrraedd eu nod.
Mae tudalen Apêl De Affrica ar y wefan hefyd yn cynnwys manylion am waith ein partneriaid, deunydd ar gyfer codi arian ac addoliad, ynghyd â’r wybodaeth ddiweddaraf am hynt a helynt yr apêl .
Clwyfau dyfnion
Er bod y sefyllfa wedi gwella tipyn yn Ne Affrica ers diwedd apartheid, mae yna glwyfau dyfnion o hyd: y niwed a achoswyd gan apartheid, diweithdra, HIV ac AIDS a thlodi dybryd.
Mae mwy nag 20 million o bobl De Affrica yn byw ar lai na £1 y dydd a miliwn o blant yn amddifad oherwydd AIDS.
Mae Llywydd UAC, Parchg. Dewi Myrddin Hughes yn gweld yr apêl fel ‘cyfle i ni ddysgu am y caledi, a hefyd y llwyddiant i oresgyn anawsterau’.
‘Hyderaf yn fawr y byddwn yn llwyddo i gyrraedd y nod ariannol fel y gallwn ni roi help effeithiol lle mae’r angen mor fawr.’